Styrkja kaup á búnaði 

Á þessum síðustu og verstu Covid tímum höfum við þurft að glíma við þá staðreynd að leikjum og æfingum meistaraflokka var frestað þegar mótið var rétt hafið. Þegar þetta er ritað standa vonir til þess að mót geti hafist á ný þann 13. nóvember en ljóst er að ólíklegt verður að áhorfendur verða leyfðir á leikjum, og þá bara í mjög takmörkuðum fjölda. Stöð 2 mun sýna frá fleiri leikjum en áður sem er gott fyrir okkar samstarfsaðila enda sjást auglýsingar þá oftar í sjónvarpi sem telst kostur.  Það verða þó ekki allir leikir sýndir beint í sjónvarpi og til að koma til móts við eftirspurn þá stefnum við á að bjóða upp á góðar útsendingar frá öllum meistaraflokksleikjum hið minnsta og jafnvel fikrum við okkur í yngri flokka eftir getu.

 

Hluti af þeim búnaði sem þarf er nú þegar til en þó er nauðsynlegt að uppfæra búnaðinn og að bæta við. Til stendur að bæta við myndavél ásamt myndvinnsluboxi og þrífæti. Þessi búnaður er því miður ekki ódýr og deildin á erfitt með að fjármagna þennan búnað eins og staðan er þessa dagana. Við viljum því leita til allra okkar stuðnings- og samstarfsaðila um að leggja smá í púkkið ef það er möguleiki til þess.

Heildarkostnaður þess búnaðar sem áætlað er að kaupa er u.þ.b. 460.000 kr.  Fyrir ykkur sem eru forvitin um búnaðinn sjálfan er listi yfir hann neðst á síðunni.